នាឡិកា Apple Watch បានបង្ហាញខ្លួនជាផ្លូវការហើយ! តើវាមានលក្ខណៈពិសេសអ្វីខ្លះទៅ?

កាលពីអាធ្រាតថ្ងៃច័ន្ទឆ្លងចូលថ្ងៃអង្គារ៍យប់មិញនេះ ក្រុមហ៊ុន Apple បានបង្កើតព្រឹត្តិការណ៍ដ៏ពិសេសមួយ ដើម្បីធ្វើការដាក់បង្ហាញសមិទ្ធផលថ្មីៗរបស់ខ្លួនជាច្រើនដែលមាន ដូចជាកុំព្យូទ័រ MacBook Air ស៊េរីថ្មី, និង នាឡិកា Apple Watch ជាដើម។ ជាក់ស្តែង Apple Watch បានដាក់បង្ហាញកាលពីខែកញ្ញាម្តងរួចទៅហើយ ក៏ប៉ុន្តែក្រុមហ៊ុននៅមិនទាន់បានបញ្ជាក់អោយយើងដឹងច្បាស់នៅឡើយ ទេថា នាឡិកានេះមានសមត្ថភាពអ្វី លក្ខណៈសម្បត្តិប៉ុនណា និងមានតម្លៃប៉ុន្មាននោះទេ ប៉ុន្តែនៅពេលនេះយើងបានដឹងកាន់តែច្បាស់ហើយ។

រចនាបថ

នាឡិកា Apple Watch បែងចែកចេញជាពីរផ្នែក គឺតួខ្លួន និងខ្សែនាឡិកា ដែលពួកវាមានតម្លៃខុសៗគ្នាទៅតាមប្រភេទនីមួយៗ។ តួម៉ាស៊ីននាឡិកាមានបីប្រភេទដែលផ្សំឡើងពីអាលុយមីញ៉ូម ដែកថែប និងមាសសុទ្ធទំហំ 18 ការ៉ាត់។ អាលុយមីញ៉ូមមានតម្លៃធូរថ្លៃជាងគេ ប៉ុន្តែវាមានភាពរឹងមាំខ្លាំងណាស់ មិនងាយមានកំណូត រឺកំពិតនោះទេ រីឯកញ្ចក់របស់វាវិញត្រូវបានក្រាលដោយកញ្ចក់ប្រភេទ X-Glass ដែលមានភាពរឹងមាំជាងកញ្ចក់ធម្មតា 5 ដង។ ចំពោះម៉ាស៊ីនដែលផ្សំពីដែកថែបវិញ Apple បានប្រើប្រាស់សារធាតុដែកថែប 80% ស្រោបដោយស្រទាប់កាបូនពីខាងក្រៅទៀត ដែលធ្វើអោយវាកាន់តែរឹងមាំទ្វេរដង រីឯកញ្ចក់ក្រាលពីលើវិញជាប្រភេទត្បូងកណ្តៀង។ ចំពោះនាឡិកាប្រភេទចុងក្រោយ វាមានតួខ្លួនផ្សំពីមាស 18 ការ៉ាត់ឯណោះ ដែលមានពីរពណ៌គឺលឿង និងលឿងផ្កាឈូក រំលេចចេញនូវភាពថ្លៃថ្នូរបំផុត។

កញ្ចក់

នាឡិកាវៃឆ្លាតនេះមានចំនួនពីរទំហំអាស្រ័យទៅលើអ្នកប្រើប្រាស់ដែលមាន អេក្រង់ទំហំ 1.32 អ៊ីញ និង 1.5 អ៊ីញ។ អេក្រង់របស់វាជាប្រភេទ OLED បង្កើតដោយក្រុមហ៊ុន LG ដែលវាអាចបង្ហាញរូបភាពបានដិតច្បាស់ល្អ ហើយក៏មានភាពស្វិតរឹងមាំខ្លាំងណាស់ដែរ។ ចំពោះអេក្រង់ 1.3 អ៊ីញ វាមានកម្រិតភាពច្បាស់ 340 x 272 ភិចសែល និងមានដង់ស៊ីតេអេក្រង់ 290ppi រីឯម៉ូឌែល 1.5 អ៊ីញវិញវាមានកម្រិតភាពច្បាស់ 390 x 312 ភិចសែល ដែលមានដង់ស៊ីតេអេក្រង់ 293ppi។ គុណភាពអេក្រង់់របស់វានេះគឺស្ថិតនៅលំដាប់ខ្ពស់ អាចបង្ហាញរូបភាពបានដិតច្បាស់ខ្លាំង ល្អ ហើយក៏មានភាពរស់រវើកផងដែរ។

កម្លាំងម៉ាស៊ីន

Apple Watch មានរ៉េមប្រហែល 512mb និង អង្គផ្ទុកទិន្នន័យ 4GB ប្រើប្រាស់បន្ទះឈីប S1 បង្កើតដោយក្រុមហ៊ុន Samsung ដែលវាមានកម្លាំងខ្លាំងប្រហាក់ប្រហែល iPhone 4s។ កម្លាំងម៉ាស៊ីនប៉ុននេះ អាចអោយយើងប្រើប្រាស់មុខងារទូទៅបានដោយរលូន គ្មានភាពរអាក់រអួលនោះទេ ហើយវាក៏ជួយសន្សំសំចៃថ្មបានច្រើនខ្លាំងណាស់ផងដែរ។ នាឡិកានេះបានបំពាក់មកជាមួយបន្ទះឈីបទំនាក់ទំនង BCM4334 ដូច Galaxy S3 និង iPhone 5 ដែលអាចប្រើប្រាស់ជាមួយប្រព័ន្ធ Wi-Fi 8-2.11 a/b/g/n ប្ល៊ូធូស 4.0, មានវិទ្យុ និងប្រព័ន្ធ NFC ផងដែរ សម្រាប់ធ្វើការទូទាត់ប្រាក់ជាមួយសេវាកម្ម Apple Pay។

ចំពោះកម្លាំងថ្មវិញ អ្នកអាចប្រើនាឡិកា Apple Watch បានជាមធ្យម 18 ម៉ោងឯណោះសម្រាប់ការប្រើប្រាស់មុខងារទូទៅ ហើយវាក៏អាចសាកបានលឿនរហ័សបានដែរ តាមរយៈឌុយសាក MagSafe ដោយចំណាយពេល 1 ម៉ោងសម្រាប់សាកបានពេញ 80% រឺក៏ 2.5 ម៉ោង ដើម្បីពេញបាន 100%។

Software

Add caption

Apple បានបង្កើត Software អោយសាមញ្ញបំផុត មិនសាំញ៉ាំនោះទេ ដើម្បីយើងមានភាពងាយស្រួលក្នុងការប្រើប្រាស់នឹងមើល។ ផ្ទៃអ៊ីនធឺហ្វេសរបស់វានឹងបង្ហាញជូននូវ icon កម្មវិធីជាច្រើន ហើយដើម្បីបើកមុខងារ ត្រឡប់ក្រោយយើងគ្រាន់តែគ្រវាស ឆ្វេងស្តាំ លើក្រោមតែប៉ុណ្ណោះ។ ជាមួយនឹងនាឡិកានេះ អ្នកអាចធ្វើការទទួលការហៅទូរស័ព្ទចូល ផ្ញើសារ ឆែកផែនទី ប្រើប្រាស់កម្មវិធីតាមដានសុខភាព កម្មវិធី Facebook, Twitter, អ៊ីម៉ែល, ឆែកកាលវិភាគ, កំសាន្ត និងមានកម្មវិធីជាច្រើនទៀតដែលអ្នកនឹងអាចដោនឡូដយកមកប្រើប្រាស់ បាន។ នាឡិកានេះអាចប្រើប្រាស់បានជាមួយតែទូរស័ព្ទ iPhone 5, 5s, 5c, 6 និង 6 Plus ប៉ុណ្ណោះ ហើយតម្រូវអោយដំណើរការដោយ iOS 8.2 ឡើងទៅ។

តម្លៃ និងពេលចេញលក់

នាឡិកាដ៏ពិសេសរបស់ក្រុមហ៊ុន Apple នេះនឹងមានចេញលក់ចាប់ពីថ្ងៃទី 24 មេសានេះតទៅហើយ ដែលវាមានតម្លៃចាប់ពី 350$ ដល់ 17,000$។ តម្លៃនេះខុសគ្នាអាស្រ័យទៅលើប្រភេទតួនាឡិកាថាជា អាលុយមីញ៉ូម ដែកថែប រឺក៏មាស ហើយក៏អាស្រ័យទៅលើប្រភេទខ្សែនាឡិកាផងដែរ ដែលមានដូចជាជ័រស្វិត ស្បែក និងលោហៈធាតុ។

នាឡិការបស់ Apple មួយនេះពិតជាមានរចនាបថស្រស់ស្អាត និងប្រណិតខ្លាំងណាស់ រីឯសមត្ថភាពរបស់វាក៏មិនអន់ផងដែរ។ តើអ្នកទាំងអស់គ្នានឹងធ្វើជាម្ចាស់របស់វាដែររឺទេ នៅពេលដែលវាមានលក់នៅលើទីផ្សារក្នុងប្រទេសកម្ពុជា?

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.